នៅថ្ងៃពុធ ៧កើត ខែផល្គុន ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី០៩ ខែមីនា ឆ្នាំ២០២២ នៅសាលប្រជុំអធិការដ្ឋាននគរបាលខណ្ឌដង្កោ លោក វរសេនីយ៍ឯក ជឹម ស៉ីថា អធិការនគរបាលខណ្ឌដង្កោ បានអញ្ជើញជួបសំណេះសំណាលជាមួយកងកម្លាំងនគរបាលនារី នៃអធិការដ្ឋាននគរបាលខណ្ឌដង្កោចំនួន ៣៩រូប ដើម្បីអបអរសាទរខួបលើកទី១១១ នៃទិវាសិទ្ធិនារី អន្តរជាតិ ៨ មីនា ក្រោមប្រធានបទ "សមភាពយេនឌ័រ ថ្ងៃនេះ ដើម្បីមានចីរភាពនាពេលអនាគត "។
ក្នុងពិធីនោះដែរ លោក អធិការ ក៏បាន សម្ដែងការកោតសរសើរ លើកទឹកចិត្ត និងអរគុណចំពោះវីរភាពរបស់កងកម្លាំងនារីទាំងអស់ ដែលបានលះបង់ធ្វើពលីកម្មគ្រប់បែបយ៉ាងដើម្បីបុព្វហេតុជាតិមាតុភូមិ ប្រកបដោយឆន្ទះ មនសិការបន្តដិតជាប់ក្នុងស្មារតី នៃកងកម្លាំងនគរបាលនារី ដើម្បីចូលរួមការពារសន្តិសុខ សុវត្ថិភាព និងរៀបចំសណ្តាប់ធ្នាប់សាធារណៈជូនប្រជាពលរដ្ឋក្នុងមូលដ្ឋាន។
ក្នុងឱកាសដ៏ពិសេសនេះ លោក អធិការ ក៏បានពាំនាំនូវការផ្ដាំផ្ញើសួរសុខទុក្ខពីសំណាក់ឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ ដល់កងកម្លាំងនគរបាល នារី និងបានផ្តល់ ជូននូវបាច់ផ្កាជា អនុស្សាវរីយ៍ ដល់ កងកម្លាំងនគរបាលនារី រួមទាំងសារ៉ុងនិងថវិកាមួយចំនួនផងដែរ។

