ដោយសង្កេតឃើញពីវប្បធម៌បាញ់ទឹកដាក់គ្នា និយមលេងច្រើនកុះករក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ លោកបណ្ឌិត សុខ ទូច បានលើកឡើងថា ការបាញ់ទឹកដាក់គ្នានៅថ្ងៃចូលឆ្នាំ គួរតែបង្វែរទឹកមកបាញ់ដាក់ដំណាំវិញ ដើម្បីឱ្យស្រុកទេសរបស់យើងមានបន្លែសម្បូរហូរហៀរ នឹងមិនមានការនាំចូលពីប្រទេសជិតខាង។ នេះបើយោងតាមសំណេររបស់លោកដែលបានសរសេរបង្ហោះនៅលើទំព័រហ្វេសប៊ុកផេចនៅព្រឹកថ្ងៃទី១៦ ខែមេសា ឆ្នាំ២០២២ ត្រូវនឹងថ្ងៃទី៣ នៃពិធីបុណ្យចូលឆ្នាំខ្មែរ ដោយលោកបានរៀបរាប់ដូចខាងក្រោមថា÷
នាឱកាសបុណ្យចូលឆ្នាំថ្មីប្រពៃណីជាតិខ្មែរនេះ យើងឃើញថា វប្បធ៌មបាញ់ទឹកដាក់គ្នាហាក់មានភាពរីកដុះដាលពេញផ្ទៃប្រទេស សូមបន្តវប្បធម៌បាញ់ទឹកដើម្បីភាពត្រជាក់ត្រជុំនេះ ដោយបង្វែពីការបាញ់ទឹកដាក់មនុស្ស មកបាញ់ដាក់ដំណាំវិញ យើងសង្ឃឹមថា បន្លែស្រុកយើងនឹងសម្បូរហូរហៀរ នឹងមិននាំចូលពីប្រទេសជិតខាងទៀតទេ។
គួរបញ្ជាក់ផងដែរថា÷ បុណ្យចូលឆ្នាំថ្មី ប្រពៃណីជាតិខ្មែរ ប្រជាពលរដ្ឋកម្ពុជាតែងតែលេងបាញ់ទឹកដាក់គ្នាទៅវិញទៅមកស្ទើរតែគ្រប់ទីកន្លែងនៅក្នុងប្រទេសកម្ពុជា ដើម្បីជាការកម្សាន្តសប្បាយ និងអបអសាទរនៅក្នុងថ្ងៃបុណ្យចូលឆ្នាំថ្មីរបស់ខ្មែរ។ ការលើករបស់លោកបណ្ឌិត សុខ ទូច គឺប្រហែលជាចង់ឱ្យប្រជាពលរដ្ឋគិតគូរពីការខ្ជះខ្ជាយទឹក និងត្រូវចេះទាញយកផលប្រយោជន៍ពីការប្រើប្រាស់ទឹកវិញ។








